Nenos "problemáticos"

 

Os 102 rapaces resolveron as probas en trío. / juan varela

S. R. P. / A Coruña

Se aos rapaces "lles ensinasen a andar en bici na escola, non aprenderían na vida. Saberían todo sobre o aparello, a distancia dos raios, a relación entre as marchas e o aproveitamento do esforzo, a presión ideal das rodas... Toda a teoría pero, de andar, nada de nada". Coque Pazos, coordinador do Rebumbio e membro de Agapema (Asociación Galega de Profesores de Matemáticas, que convoca estas probas), cre que os números que se estudan na clase e os que se usan na vida "van por camiños moi diferentes" e así nos vai cando deixamos a escola.

Os 102 rapaces, en grupos de tres, de 25 colexios da zona que superaron a selección para esta versión da olimpíada matemática para os cativos (de sexto de Primaria) son os mellores da clase nisto dos números. Con todo, segundo conta Pazos, a maioría dos escolares galegos "aborrecen as matemáticas", e "non hai dereito". O Rebumbio é un reto, pero case ningún neno gozaría solucionando os problemas como os integrantes destes 34 equipos bautizados con nomes como Operamos sen bisturí ou Multiplícate por cero.

O gran problema non é ningún destes que aparecen no gráfico, e que eran os que compuñan a proba de onte, o gran problema é o método de ensino. Pazos di que o peor é que "os pais son os primeiros en esixir que os nenos de hoxe aprendan co mesmo sistema que eles aprenderon", e aquel método non contemplaba as prácticas. "A maior desgraza para un profesor é ver aos alumnos no recreo sen saber como repartir os cromos".

Por iso, o premio da final galega, que terá lugar o 4 de xuño no Forum Metropolitano, con 15 equipos de Vigo, Santiago, Ferrol, Lugo, Ourense e A Coruña, incluirá unha visita á casa das Ciencias, un banquete e un "percorrido matemático" polo parque de Santa Margarida. Pura práctica.