Non á prohibición da calculadora na selectividade

Os centros de ensino secundario veñen de recibir unha circular do “Grupo de traballo de matemáticas II” da Comisión Interuniversitaria de Galicia. Nesta carta comunícase a prohibición do emprego de calculadoras na selectividade deste curso, na materia de Matemáticas II.

O Sindicato de Estudantes rexeita enerxicamente esta inxusta medida.

O argumento da directora de dito “Grupo de traballo de matemáticas II” para xustificala é inaceptable. Segundo ela, “dita norma promoveuse ante a constatación de que o uso de certo tipo de calculadoras (que aínda non sendo programables puidesen facer cálculos de tipo integrais, derivadas…) colocaba en situación de desventaxa a uns alumnos fronte a outros”.

Dende logo, se o que se quere é evitar tal situación, existen outras solucións, como é poñer gratuitamente a disposición de todos os alumnos o mesmo modelo de calculadora.
En calquera caso, é evidente que a prohibición do uso da calculadora no xa inxusto selectivo endurece enormemente a proba de matemáticas II. Os estudantes estamos sometidos a unha enorme tensión durante a selectividade, e calquera factor que aumente esa tensión é inaceptable, sendo como é que do resultado do selectivo depende en grande medida o noso futuro.

O intento da directora do Grupo de traballo de tranquilizarnos dicindo que terán en conta dita prohibición (¡¡qué menos!!) non nos serve. Se durante todo o curso os alumnos empregamos a calculadora, é evidente que non poder facelo no selectivo vai xerarnos unha tensión adicional.

De feito,a prohibición é ainda máis absurda porque, como denunciou a Asociación Galega de Profesores de Educación Matemática, “a potenciación do uso racional das calculadoras (...) é un dos obxectivos mencionados no Deseño Curricular Base de Matemáticas da ESO e do Bacharelato”.

A selectividade é unha proba que só pretende impedir o acceso dunha parte dos estudantes á Universidade. Na medida na que non existen prazas universitarias dabondo para cubrir a demanda, os diferentes gobernos teñen mantido a selectividade a xeito de peneira. Se o Goberno e a Xunta creasen as prazas universitarias necesarias, a selectividade desaparecería. Por iso, o Sindicato de Estudantes reivindica a creación de 250.000 prazas universitarias en todo o Estado e a eliminación da selectividade.

Ata a consecución deste obxectivo, opoñémonos totalmente a calquera medida que endureza a selectividade e que dificulte aínda máis o xa difícil acceso dos fillos dos traballadores á Universidade.

O Sindicato de Estudantes xa solicitou unha reunión urxente co Conselleiro de Educación da Xunta, para esixirlle a retirada inmediata desta prohibición do uso da calculadora. Esta prohibición só afecta a un número limitado de estudantes, pero pensamos que todos estamos interesados en que se retire, para evitar precedentes e que mañá poida haber outra medida que afecte especificamente a outra materia. Por iso pedímosvos a todos que protestedes co envío de faxes ou correos electrónicos ó conselleiro. O seu fax é o 981 54 44 99 e o seu correo é gc@edu.xunta.es, con copia a santiago@sindicatodeestudiantes.org. Así mesmo, propoñémosvos facer unha recollida de sinaturas contra esta medida entre todos os estudantes do voso centro. Se nolas enviades, nós entregarémolas todas na Xunta. O enderezo para enviárnolas é: Apartado de Correos 350 15700- Santiago.

ORGANÍZATE E LOITA CONNOSCO

Nón a prohibición do uso da calculadora,
Nón ó endurecemento da selectividade,
Acceso directo á Universidade